1. أساسيات النسخ واللصق
المجموعة دي من الاختصارات هي حجر الزاوية في استخدام الكمبيوتر وأكيد سمعت عنها قبل كده بس الأهم هو إنك تعود إيدك تستخدمها في كل مكان لأنها بتشتغل في النصوص والملفات والمجلدات وحتى في برامج التصميم.
1. (Ctrl + C) لنسخ النصوص أو الصور أو حتى الملفات ولما بتستخدم الاختصار ده الكمبيوتر بياخد نسخة من الحاجة اللي حددتها وبيحفظها في ذاكرة مؤقتة اسمها الحافظة ويسيب الأصل في مكانه من غير ما تضطر تدوس كليك يمين وتدور في القوايم.
2. (Ctrl + X) للقص أو النقل والفرق بينه وبين النسخ إن القص بيشيل الحاجة من مكانها الأصلي خالص عشان تنقلها لمكان جديد وده مفيد جداً لو بترتب فقرات في ملف وورد أو بتنقل ملفات من فولدر للتاني.
3. (Ctrl + V) للصق الحاجة اللي إنت عملتلها نسخ أو قص الاختصار ده بيفضي اللي جوه الحافظة في المكان اللي إنت واقف فيه وممكن تلصق نفس الحاجة أكتر من مرة عادي جداً.
4. (Ctrl + Shift + V) ده بقى اختصار إضافي سري وناس كتير متعرفوش وهو بيلصق الكلام من غير أي تنسيق يعني لو نسخت كلام متلون وخطه كبير من موقع على النت وعملت الاختصار ده هينزل في ملفك كنص عادي جداً شبه الكلام اللي إنت بتكتبه وهيوفر عليك تعب إعادة التنسيق.
2. التراجع عن الأخطاء
الخطأ وارد جداً وإحنا شغالين على الكمبيوتر ممكن تمسح فقرة مهمة بالغلط أو تنقل ملف لمكان متعرفوش أو تبوظ شكل صورة بتبتعدل عليها بدل ما تتخض أو تقلق استخدم اختصارات التراجع اللي هتنقذ الموقف.
1. (Ctrl + Z) للتراجع عن آخر حاجة عملتها والاختصار ده شغال في كل حتة تقريباً سواء في الوورد أو الفوتوشوب أو المتصفح وحتى في ملفات الويندوز العادية لو مسحت ملف بالغلط وراح سلة المهملات ضغطة واحدة على الاختصار ده هترجعه مكانه فوراً وتقدر تدوس عليه كذا مرة عشان تتراجع عن كذا خطوة ورا بعض.
2. (Ctrl + Y) الاختصار ده بيطلعك خطوة لقدام وهو عكس زرار التراجع بالظبط يعني لو كتبت كلام مثلاً وبعدين دوست تراجع (Ctrl + Z) فالكلام ده اتمسح واكتشفت إنك اتسرعت وندمت وعايز الكلام اللي اتمسح ده يرجع يظهر قدامك تاني فالاختصار ده هيرجعلك اللي راح في ثانية كأنك معملتش تراجع أصلاً.
3. التنقل السريع بين النوافذ
طبيعة شغلنا دلوقتي بتخلينا نفتح كذا حاجة في نفس الوقت نادراً لما بنشتغل على برنامج واحد بس دايماً المتصفح مفتوح جنبه برنامج الوورد أو برنامج أغاني أو شات التنقل بين كل ده بالماوس وإنك تنزل تدوس على شريط المهام تحت دي عملية بطيئة ومملة جداً.
1. (Alt + Tab) ده الاختصار الكلاسيكي للتبديل بين البرامج المفتوحة ولما بتدوس عليه بتظهرلك شاشة صغيرة فيها كل حاجة إنت فاتحها تقدر تختار الشاشة اللي إنت عايزها وأول ما تشيل إيدك هتروحلها فوراً.
2. (Alt + Shift + Tab) للتنقل بين النوافذ المفتوحة بس في الاتجاه العكسي يعني من اليمين للشمال.
3. (Win + Tab) يفتحلك شاشة منظمة بتعرض كل البرامج اللي إنت فاتحها قدامك عشان تختار منها بس الميزة العبقرية هنا إنه بيسمحلك تعمل حاجة اسمها "أسطح مكتب افتراضية" يعني كأن عندك أكتر من شاشة أو جهاز كمبيوتر جوه جهازك تقدر تعمل سطح مكتب مخصوص تفتح عليه برامج الشغل والملفات المهمة، وسطح مكتب تاني خالص تفتح عليه أفلامك أو ألعابك وبكده تفصل بين الشغل والترفيه من غير ما تتشتت ولا البرامج تدخل في بعضها وتعمل زحمة.
4. التحكم السريع في الشاشة
وإنت شغال بتندمج وتفتح برامج وصفحات كتير لحد ما تلاقي الشاشة بقت زحمة جداً والبرامج كلها راكبة فوق بعضها ومغطية على بعض لو حبيت تنزل كل الزحمة دي عشان تشوف سطح المكتب وتفتح ملف جديد هتضطر تقفل أو تنزل كل شاشة لوحدها بالماوس وده شيء بيضيع وقت وممل جداً كمان لو عايز تفتح ملفين جنب بعض وتقارن بينهم هتقعد تسحب وتظبط حجم كل واحد بإيدك وتتعب نفسك الاختصارات دي بقى هتحللك كل اللخبطة دي بضغطة زرار واحدة وتخليك ترتب شاشتك في ثانية وتوفر مجهودك.
1. (Win + D) الاختصار ده بيخفي كل البرامج اللي إنت فاتحها وينزلها لتحت في شريط المهام في ثانية واحدة عشان يظهرلك سطح المكتب فاضي قدامك الميزة العبقرية هنا إنك لو دوست عليه كمان مرة هيرجعلك كل البرامج اللي كانت مفتوحة مكانها زي ما كانت بالظبط كأنك معملتش حاجة.
2. (Win + الأسهم) المقصود بالأسهم هنا هي زراير الاتجاهات الأربعة اللي في الكيبورد (يمين وشمال وفوق وتحت) الاختصار ده بيقسم الشاشة بتاعتك نصين بالظبط يعني لو فاتح برنامج ودوست على زرار الويندوز مع السهم اليمين البرنامج ده هياخد النص اليمين من الشاشة بالظبط ولو فاتح برنامج تاني ودوست ويندوز مع السهم الشمال هياخد النص الشمال الحركة دي ممتازة جداً ومريحة لو فاتح ملفين وعايز تنقل كلام أو تقارن بينهم وهما الاتنين مفتوحين قدامك في نفس الوقت.
5. سجل الكوبي والبيست
الاختصار ده بيعتبر كنز مخفي في الويندوز وناس كتير جداً متعرفش إنه موجود رغم إن فوايده متتعدش وهيريحك جداً في الشغل.
. (Win + V) بيفتحلك سجل النسخ بالكامل في العادي لما بتعمل نسخ لحاجة جديدة الحاجة القديمة اللي نسختها قبلها بتطير وتضيع لكن مع الميزة دي الويندوز بيحتفظ بقائمة فيها آخر نصوص وصور إنت عملتلها نسخ ولما بتدوس على الاختصار ده بتظهرلك شاشة صغيرة فيها كل الحاجات اللي نسختها متسجلة تحت بعضها ومجرد ما تضغط بالماوس على أي حاجة فيهم هتنزل وتتلصق قدامك في ثانية عشان تشغل الميزة دي لأول مرة هتدوس على الاختصار وبعدين تدوس على كلمة Turn on اللي هتظهرلك وبعدها عمرك ما هتفقد أي كلام نسخته وهتقدر تنسخ كذا فقرة ورا بعض وتلصقهم براحتك.
6. البحث الذكي والسريع
كام مرة لقيت نفسك فاتح صفحة نت طويلة عريضة وعمال تنزل وتقرأ عشان تدور على كلمة أو معلومة معينة أو حتى بتدور على اسم شخص في ملف إكسيل فيه آلاف الأسماء التدوير بعينك وباستخدام الماوس بس عملية مرهقة جداً وبتاخد وقت طويل وممكن عينك تزغلل وتفوتك الحاجة اللي بتدور عليها.
1. (Ctrl + F) الاختصار ده سحري وبيفتحلك شريط بحث صغير في أي برنامج إنت فاتحه تقريباً سواء متصفح النت أو الوورد أو حتى ملفات الـ PDF وبمجرد ما تكتب فيه الكلمة اللي بتدور عليها البرنامج هيظلل كل الأماكن اللي الكلمة دي مكتوبة فيها في الصفحة وهينقلك ليها فوراً من غير ما تتعب نفسك وتضيع وقتك في التدوير اليدوي.
2. (F3) الزرار ده بقى بيكمل شغل الاختصار اللي فات لأنك بعد ما بتبحث عن كلمة معينة وتلاقيها الزرار ده بيشتغل كبديل سريع عشان ينقلك للكلمة اللي بعدها على طول في نفس الصفحة من غير ما تضطر تمسك الماوس وتدور بنفسك.
7. التحكم في متصفح الإنترنت
بما إننا بنقضي أغلب وقتنا على النت فاستخدام اختصارات المتصفح زي جوجل كروم بيعتبر حاجة أساسية عشان تنجز وتتصفح بسرعة من غير ما تعطل نفسك بالماوس كل شوية.
1. (Ctrl + T) الاختصار ده بيفتحلك صفحة جديدة من فوق جنب الصفحة اللي إنت فاتحها دلوقتي عشان لو حبيت تبحث عن حاجة تانية من غير ما تقفل أو تسيب الحاجة اللي في إيدك.
2. (Ctrl + W) الاختصار ده بيقفل الصفحة اللي إنت فاتحها دلوقتي على طول وده أسرع وأسهل بكتير من إنك تمسك الماوس وتفضل تدور على علامة الإكس الصغيرة اللي فوق عشان تدوس عليها وتتمسح.
3. (Ctrl + Shift + T) الاختصار ده هو المنقذ الحقيقي بتاعك لو قفلت أي صفحة نت من غير ما تقصد أو بالغلط دوس عليه والمتصفح هيرجعلك آخر صفحة قفلتها فوراً بنفس الكلام اللي كنت بتقرأه فيها وتقدر كمان تدوس عليه كذا مرة ورا بعض عشان ترجع كل الصفحات اللي قفلتها قبلها.
4. (Ctrl + L) الاختصار ده بيحدد أو بيظلل اللينك بتاع الموقع اللي مكتوب فوق في الشريط عشان تقدر تمسحه وتكتب اسم موقع جديد أو حتى تنسخه وتبعته لأي حد من أصحابك من غير ما تلمس الماوس خالص.
8. أخذ لقطة شاشة احترافية
لو عايز تاخد سكرين شوت أو لقطة للشاشة وإنت شغال بدل ما تقعد تدور على برامج أو إضافات تنزلها ويندوز 10 و 11 فيهم أداة سحرية وجاهزة بتعملك ده في ثانية وباحترافية عالية جداً.
. (Win + Shift + S) الاختصار ده بيشغل أداة تصوير الشاشة فوراً وأول ما بتدوس عليه هتلاقي الشاشة بهتت أو ضلمت شوية وظهرلك شريط صغير من فوق الشريط ده بيخليك ترسم مربع بالماوس على الحتة اللي إنت عايز تصورها بس من الشاشة بدل ما تصور الشاشة كلها على بعضها وأول ما بتشيل إيدك من على الماوس الصورة دي بتتنسخ لوحدها وتقدر تروح على أي شات مع أصحابك وتعمل لصق وتبعتهالهم على طول الاختصار ده هينفعك جداً لو عايز تصور رسالة خطأ ظهرتلك أو جزء معين من مقال عجبك وتشاركه في ثواني والميزة الحلوة كمان إنك هتلاقي الصورة دي اتحفظت عندك على الجهاز في فولدر الصور أو لقطات الشاشة عشان لو حبيت ترجعلها في أي وقت تلاقيها موجودة ومتضيعش منك.
9. قفل الجهاز وتأمين بياناتك
الأمان والخصوصية بتاعتك على الكمبيوتر دي حاجات مينفعش نتهاون فيها أبداً خصوصاً لو إنت شغال في شركة أو قاعد في مكان عام زي كافيه أو مكتبة أو حتى في البيت ومش عايز حد يلعب في جهازك وإنت مش موجود.
. (Win + L) الاختصار ده بيقفل جهاز الكمبيوتر بتاعك فوراً في نفس اللحظة وأول ما تدوس عليه بتظهرلك شاشة القفل ومحدش هيعرف يفتح الجهاز أو يشوف إنت بتعمل إيه غير لما يكتب الباسوورد بتاعك عود نفسك تستخدم الاختصار ده كل مرة تقوم فيها من على مكتبك حتى لو دقيقة واحدة عشان تعمل كوباية شاي لأنه هيحمي كل ملفاتك وشغلك المفتوح من أي حد متطفل.
10. الكتابة وتعديل النصوص كالمحترفين
لو إنت بتكتب كتير على الكمبيوتر سواء كنت كاتب أو مدون أو حتى بتعمل أبحاث فتعديل الكلام المكتوب هو أساس شغلك إنك تحرك مؤشر الكتابة حرف بحرف بالأسهم العادية أو تستخدم الماوس عشان تظلل وتحدد سطر معين ده بيضيع وقت كبير جداً ومجهود على الفاضي الاختصارات دي هتخليك تتحكم في الكلام وتعدله بسرعة من غير ما ترفع إيدك من على الكيبورد.
1. (Ctrl + الأسهم) وزي ما اتفقنا المقصود بالأسهم هنا هي زراير الاتجاهات الأربعة (يمين وشمال وفوق وتحت) اللي في الكيبورد الاختصار ده بيخليك تحرك مؤشر الكتابة بتاعك ينط كلمة بكلمة كاملة بدل ما يفضل يمشي حرف بحرف ببطء وده هيخليك تتنقل بين الجمل بسرعة الصاروخ.
2. (Shift + الأسهم) الاختصار ده بيخليك تظلل وتحدد الكلام اللي إنت كاتبه وإنت بتتحرك عشان لو عايز تمسحه أو تنسخه بدل ما تمسك الماوس وتفضل تسحب وتحدد بيه وممكن يفلت منك.
3. (Ctrl + Shift + الأسهم) ده بقى بيجمع بين الميزتين اللي فاتوا وبيخليك تظلل وتحدد كلمات كاملة ورا بعض بسرعة فائقة عشان تنجز في التعديل.
4. (Home) الزرار ده هتلاقيه موجود في الكيبورد من فوق ولما بتدوس عليه وإنت بتكتب بينقل مؤشر الكتابة بتاعك لأول السطر في الجملة اللي إنت واقف فيها فوراً في خطوة واحدة بدل ما تفضل دايس على السهم الشمال فترة طويلة لحد ما ترجع للأول.
5. (End) الزرار ده موجود جنب زرار Home بالظبط ولما بتدوس عليه بيطير بيك لآخر الجملة اللي إنت بتكتب فيها فوراً عشان لو حبيت تكمل كتابة أو تضيف حاجة في آخره.
6. (Ctrl + Home) الاختصار ده بيطلعك لأول المستند أو أول صفحة في الملف اللي إنت فاتحه فوق خالص في ثانية واحدة مهما كان الملف طويل وفيه كلام كتير.
7. (Ctrl + End) الاختصار ده عكس اللي فات وبينزلك لآخر صفحة أو آخر سطر في المستند تماماً تحت خالص بضغطة واحدة عشان توفر على نفسك النزول بالبكرة بتاعت الماوس.
الخاتمة
تعلم اختصارات الكيبورد عامل بالظبط زي تعلم السواقة في الأول ممكن تحس إنك بتفكر كتير قبل ما تدوس على أي زرار وممكن تحس إن العملية أبطأ من مسكة الماوس اللي إنت متعود عليها بس صدقني دي مجرد مرحلة مؤقتة جداً أول ما صوابعك تاخد على أماكن الزراير دي هتلاقي نفسك بتستخدمها بشكل لا إرادي وبسرعة هتبهرك إنت شخصياً ومع الوقت هتلاحظ فرق شاسع جداً في كمية الشغل اللي بتخلصه في وقت قليل وهتشكر نفسك على إنك استثمرت شوية وقت ومجهود في تعلم المهارة البسيطة والمهمة دي.
ليست هناك تعليقات:
إرسال تعليق